趙世曾　風流快活人

忽然1周 Sudden Weekly　第298期　2001年4月14日（專訪，頁82–86）

趙世曾　風流快活人

撰文：林蕾　攝影：梁幹持（專訪、家居）、何志恒（辦公室）

【卷首語（直排）】

我們對趙世曾的感覺，很極端。喜歡他的人，會羨慕他的風流瀟灑，男人希望有他的女伴，女人希望男友都像他富有。不喜歡他的，會嗤之以鼻，每每看見他被前女友數落，總不免幸災樂禍。喜歡與不喜歡，我們對趙世曾其實所知有限。一個年屆64歲的人，坐擁數億身家，身邊美女如車輪轉，沒結婚但有兒有女，除了風流之外有時還被扣上「孤寒」、「刻薄」、甚至「二世祖」的帽子。我們知道的，大概是這麼多。你或許不認同趙世曾的風流，但他會告訴你一年365日當中，有300天是在戀愛。他這刻活得很快樂，其他傳聞，一笑置之。

過千女人難敵初戀情

趙世曾的女朋友，多如天上繁星。他一生中究竟有多少個女朋友，連自己也數不清，只是「謙虛」地說：「冇正式統計過，但肯定超過一千！」

過千個女友當中，肯定有一個叫趙生難以忘懷的罷？他毫不諱言有這樣的一個人。

「我喺大陸讀書時已經認識佢，佢係一個上海女仔，姓鄔（並非烏仁），大家都好鍾意對方。後來我去咗英國讀書，佢為咗見我就去參加選美（麗池夜總會選的香港小姐），諗住贏咗之後就可以用啲獎金買機票嚟搵我。結果真係畀佢選到冠軍，但佢去到英國之後遇我唔到，我喺北部，佢去咗倫敦。」

「幾年後我讀完書返香港先知佢為我做咗咁多嘢，我好感動，但可惜嗰時佢已經結咗婚。」

「後來到我離咗婚佢再同我一齊，雖然最後都無結果，但我一直好懷念呢段感情。」

1961年的初戀，雖然在唏噓中結束，但起碼證明趙生也是一位有情人。

悔婚有前科

趙世曾的一生，似乎與選美結下不解緣。初戀情人既是選美冠軍，無獨有偶他的第一位未婚妻譚小姐也是選美出身，還與鄔小姐同屆，只是拿了個亞軍。「講起上嚟都幾巧合，香港初期嘅選美我同第一、二名都拍過拖，同第二名更訂過兩年婚。」結果是怎樣，相信不用多說了。以趙生酷愛自由的性格，當然是寧願「撻訂」，也不做「老襯」。「初初同譚小姐來往都好哋哋，但一訂咗婚之後就有種受束縛嘅感覺，一啲都唔開心，結果都係解除婚約。」

〔引文〕我一生中有8成時間都在戀愛。但我就唔係咁專一，有時會同一時間鍾意幾個女仔！

【趙世曾的繁星】

姚煒　相識於1977年，79年誕下大女兒式芝（Gigi），現再婚並育有一子。

盈盈　84年誕下兒子式浩（Howard），現再婚居美國，並育有一子。

方怡珍　台灣女星，80年代與趙交往過數年。

陳鳳芝　80年香港小姐亞軍，有警花之稱，與趙交往一段短時間。

張蓀薇　落選港姐，與趙相交兩年後因趙不肯結婚而分手，現下嫁猶太籍富豪。

樂蓓　亞姐冠軍，與趙有一段短暫情緣，年前下嫁米商林炯偉。

Terri Holladay　美越混血兒，唯一以「趙太」身分出現過的女人。92年與趙舉行轟動一時的海陸空訂婚禮，翌年誕下兒子式正（Roman），95年分手，始被發現與趙一直冇註冊過。

Michelle Nicholson　Terri離開後的首個女伴，但只是曇花一現，很快不知所終。

馬慧　北京模特兒，96年曝光，曾入住趙苑以女主人姿態出現，戀情維持3年。

烏仁　99年與馬慧分手後隨即與同樣來自大陸的烏仁打得火熱，但感情只維持了半年，分手後烏仁更向傳媒大爆趙生孤寒。

Florence　北方佳麗，甫出現時曾帶名表行頭十足，一度以為是趙生新寵，最後亦屬曇花一現。

Gina　趙生近期新歡，2月曾高調介紹給傳媒。但上星期趙生親口證實已與Gina減少來往，目前有幾位女朋友都在交往當中。

為了使兒子早日成家立室，當年趙世曾的父母試過威迫利誘，但都無法如願。

「我父母好傳統，唔贊成我有咁多女朋友，甚至話我結咗婚之後存幾多錢入我戶口，分幾多身家畀我。我就係受過呢啲壓力反而更抗拒結婚，哶〔?〕，我自己唔識賺錢咩？點解要人畀錢我結婚？」

性，量力而為

趙世曾揚言不會為一棵樹而放棄一個森林，而且還喜歡在森林裏飛翔。但飛得累了，怎樣辦？

「我當然要保持自己嘅體力同健康啦，所以我成日都keep住打波做運動，等自己唔好衰老。講到性，男人梗係會有需要啦，但我唔會辛苦自己，我會量力而為，我唔會為咗討某個女仔歡心而過於透支！」趙生說得鏗鏘有力。

他近年鍾愛的國內佳麗必定是溫柔體貼，又不會令他透支了。「一般嚟講國內嘅女仔都會就我多些少，哈！哈！」他笑道。趙世曾說比較鍾意國內同澳洲的女仔，因為脾氣好，而美國女仔就最難相處。「成日要男仔就晒佢哋囉！」弦外之音，是否在控訴前未婚妻Terri呢？

〔引文〕我個性唔適合結婚，我唔怕老咗會寂寞，我相信有大把女仔肯陪我終老，哈！哈！

我節儉，但不孤寒

雖說國內的女子深得趙生歡心，但當分手時總有鬧得不愉快，像馬慧和烏仁，更直指趙生孤寒刻薄，首飾輪流帶。「啲首飾係我阿媽留畀我嘅，有啲係我自己嘅收藏，梗係唔畀得人啦！我借畀佢哋帶，佢哋都好開心。但係一到分手時難免會激動亂講嘢，但事後冷靜番，佢哋都會打嚟同我道歉，通常十個有九個半女仔都會覺得同我一齊時好開心。

「我承認我節儉，但並不等如孤寒。你睇我追咁多靚女，試問一個孤寒嘅人又點追到女仔呢？節儉係一種美德，好似我食飯咁，食剩嘅我一定會打包，點解要浪費啫？我又鍾意食消夜，費事夜晚叫工人起身煮。

「我同我啲細路都係咁講，致富一定要從節儉開始，一個人識賺錢亦要識慳錢，唔可以為追女仔而傾家蕩產，買完汽車又買洋樓，梗係要佢節制啦。但亦唔需要刻薄自己，應使則使。你睇我，衣食住行都係用最好嘅！」

【趙苑多面睇】（圖輯標題）

兒子唔結婚冇所謂

說到子女，趙生一臉的慈祥，畢竟是三個小孩之父，與剛才品評各國佳麗那種挑剔與佻皮，活脫是兩模樣。「我從來都唔會管束我啲仔女，冇錯係會有嚴厲嘅時候，但我畀佢哋自由發展。如果兩個仔大個想好似我咁唔結婚，我一定會支持，一個人見識多啲先唔會後悔，早結婚到老咗搞婚外情豈不是仲差？」大女不結婚可以嗎？「唔……雖然話男女平等啫，但女仔都係早啲結婚好嘅！」說罷趙生也忍不住笑。

三姊弟來自三個媽咪，趙生又如何交代子女與不同母親的關係？

「佢哋目前相處得好好，我大女Gigi最錫細仔，三個好玩得埋，每星期六都會同我食飯。等佢哋再大個啲，我會好小心處理呢個問題。」儘管趙生不是一位好丈夫，但絕對是位好父親。

【趙世曾絕非二世祖】

眾人都覺得趙世曾只顧媾女，十足十花花公子二世祖，事實上並非如此，他不但不靠父蔭，還創出了一番事業。

1961年　英國Uaiveristy Of Durham建築系榮譽學士畢業，返港後加入甘銘則師樓。

1964年　自立門戶開設則師樓，其後成立華光地產。

1973年　華光地產上市。

1987年　家族生意華光航運陷入債務危機，趙世曾將6成華光地產股權賣給亞洲證券，協助家族減債。

1988年　成立卓能地產並上市，任主席至今。位於灣仔卓能21世紀廣場乃卓能地產物業，整幢大廈由趙世曾設計。

咖啡女人香

從西環到趙苑，如地獄到天堂。先是南貨舖，繼而是屠房、公眾殮房，忽然走進兩萬多呎的趙世曾府第，眼前是藍天碧海，腳下是泳池網球場，耳邊是鳥語，鼻裏是咖啡香。難怪這麼多女人都想做趙苑女主人。不知是不是心理作祟，咖啡香的當中還隱約嗅到絲絲女人香！

〔引文〕快樂對我嚟講最重要。我過嘅係瀟灑一生，冇乜遺憾。

圖說：傭人每朝都會為趙世曾準備三份報紙，財經、娛樂、地產包冇走漏眼。

圖說：趙世曾平日已慣對傳媒，他更笑言：「你哋使乜偷拍吖，想搵我做訪問咪同我秘書約囉！」

圖說：Gigi（姚煒所生）非常愛錫細佬Roman（Terri所生），現時女的已21歲，男的8歲。

圖說：趙世曾位於卓能21世紀廣場頂樓的辦公室也是由他包辦設計。

圖說：趙家的泳池，比用來比賽的標準池還要大。

圖說：露台的兩張沙灘椅，不知換過多少位女主人？

圖說：龐大而有氣勢的餐桌，每個星期六都會因為趙生的3位子女到來而增添熱鬧。